初試Fissler高速鍋：粉葛紅蘿蔔鯪魚煲豬月展

一直都好想買Fissler高速鍋，直到最近喺Sogo Thankful Week入手！比平時抵好多㗎，原價3千幾4千，而家個鍋加埋個蓋同埋一隻焯＄21xx，真係忍唔住要試一個喇！之前成日聽阿媽講，高速煲煲啲嘢唔入味，我就要親身試試先安落，可能唔同嘅高速煲煲出嚟嘅效果都有啲分別呢～哈！XP 

Fissler係第一個發明高壓煮食技術嘅德國品牌，鋼水同個product有保証，所以我好有信心！我買左呢個係無得調壓嘅，但係如果煮嘅嘢唔需要好準確絲毫不差先煮到嘅話，呢個model都已經夠用。

今次第一次開鍋，心情好緊張，因為未用過呢種煲，哈哈！

呢日我整個粉葛紅蘿蔔鯪魚湯，我呢個鍋6L，佢入面有條‘Max’線，我加晒料都去左一半，其實真係有啲擔心唔夠大，平時我要用8L嘅鍋嚟煲湯，煲8﹣10碗，但我相信佢高壓嘅原理，可以將鍋裡面嘅食物毫無蒸發地煮熟，而用法無錯的話，你落幾多水就係會煲到幾多水的。

用法就好簡單，將所有材料放入煲內，注水至‘Max’ 線，上蓋至聽到‘click’一聲確定鎖上後，程序就會開始。。。

真係勁緊張，一路等佢煲緊嘅時候，佢一路噴緊啲蒸氣出嚟，呢個過程就係將鍋裡面嘅蒸氣排出，直至真空，呢個時候會見到個indicator上升，

期待嗰條白色圈終於出現喇！XDDD

見到第一條白色圈就可以將火較返小，然後用平時煮食1/2嘅時間嚟煮，（或者見到第二條白色圈先較返小火，用1/3時間煮）所以粉葛湯平時要煲3個鐘，咁我用高速煲就煲1個鐘

一路煲嘅時候，我真係勁愛佢，因為佢高壓煲緊嘅時候完全無煙無聲，就好似無煲緊嘅一樣，超正！

仲有超正嘅係，當你煲完嘅時候，要等個indicator完全跌返去原位，個煲蓋先可以開到嘅，呢個時候你想快啲，可以輕輕按個手柄個lock制，佢會噴啲蒸氣出嚟（減壓），當然不可以一次過夾梗嚟開個蓋，唔會爆炸，但係鍋裡面啲湯會噴射出嚟，佢噴蒸氣嘅地方喺手柄兩側，真係設計得非常貼心，個手柄好似我咁放嘅話，啲蒸氣係完全唔會噴到自己的，大約等5分鐘，個鍋完全減壓之後，個蓋就可以打開喇！真係好安全啊！

煲完1個鐘喇，呢個時候啲湯都唔係好「溶」

換個普通蓋滾多15分鐘，就解決左阿媽擔心唔夠味嘅問題喇！

睇下！啲湯好「溶」㗎！老公都話似平時啲湯嘅味！我就覺得無10成都有9成；P

試過用之後，我覺得好方便喎，6L呢個size都煲到7﹣8碗湯，呢個湯咁多料喎！仲有就係，煲湯其實煲得越耐，食物嘅營養就流失得越多，而家用少左咁多時間煲湯，食物有益啲，同埋煤氣費都慳返啲，煮飯又輕鬆啲！

～Recipe～

材料 Ingredients：

豬月展 11両
紅蘿蔔 1條
粉葛 1個
赤小豆、扁豆 約＄5
鯪魚（尾部） 2條
蜜棗 2粒
金華火腿 2粒
薑 4片

做法 Directions：

材料洗淨切好，鯪魚略煎，全部材料下高速鍋，加水至‘Max’線，中火加壓後小火煲1小時，轉普通蓋滾15mins，完成。

或

（一般鍋）加3L水大火滚20mins後轉小火煲3小時，完成。