作為一道矜貴主菜，我想一定非鮑鮑莫屬了！炆鮑魚真係不難，只要有恆心同毅力......就得㗎喇！哈哈哈！只要準備好晒材料，就計時喇：首先發個鮑魚2日；然後處理乾淨後；煲個燒鴨高湯1個鐘；放好鮑鮑同其他材料入砂煲／鑄鐵鍋裡面，連同燒鴨高湯煮滾後小火一共炆約20個鐘，其間每3﹣4個鐘熄火唔開蓋焗8個鐘，然後再炆再焗...再炆...再焗......；然後食之前再用蠔油茨扣一扣佢，搞掂！成為60個鐘。如果計埋發鮑鮑嗰48小時，成為108個鐘喇！
呵呵呵！
雖然要咁多個鐘，咁其實好多時間都唔係好駛理佢嘅～咁你可以做其他嘢囉；P
炆好鮑魚，我構思一下擺盤，普通放條菜好似唔夠別緻，不如做個菜蓉，放喺鮑魚下面，吸晒鮑魚汁料嘅精華，應該不錯吧～！本來想做圓形，但呢個心心size剛剛好，就用了，對妹妹來說應該更sweet吧，哈哈～！
今次小試牛刀，唔係咩靚鮑，70頭中東養鮑，其實我諗70頭大約可以酌量縮減時間，用左炆4焗8再炆3焗8都效果都唔錯，其實最緊要係腍，唔夠腍就再炆再焗，直至腍為止就OK。今次成功，有望下次靚鮑鮑：D
＊參考自老自號同昌鮑魚炆法＊
RECIPE
材料：
竹籬 1片
鮑魚(70頭) 4両
鵝掌 8隻
燒鴨 半隻
燒骨 $20
老雞 半隻
肉排 $30-40
蠔油 約2T
生粉水(optional) 適量
做法：
- 炆前準備。用水放雪櫃浸發鮑魚2天，每天換水1-2次，浸發好，用鉸剪去除鮑魚頭頭黑色內臟部份，用軟刷刷去鮑魚身上及裙邊的污垢（如煲湯可在這步驟後直接使用）
- 燒鴨連3L水煲滾後轉小火煲1小時成高湯備用
- 預備靚砂煲／鑄鐵鍋，順次序放入（optional可先放豬油）竹籬、肉排、鮑魚、鵝掌、燒骨、老雞，注入燒鴨高湯至剛剛蓋過材料面，蓋上後水滾轉小火以炆4小時，焗8小時，再炆3小時，再焗8小時＊炆鮑魚途中見水量下降可加燒鴨高湯；焗時途中不可開蓋 一共用明火炆的時間約20小時，最後一次不用開蓋，這樣鮑魚就會又腍又入味
- 將炆好鮑魚取出，準備一個平底鑊，舀入炆鮑魚的湯汁及蠔油，加入鮑魚及鵝掌，用慢火扣，反覆將湯汁淋在鮑魚及鵝掌上，直至湯汁濃稠，或可加生粉水使之濃稠，便可上碟，完成。
小棠菜蓉做法：
將小棠菜用滾水焯熟後，加入少許鹽及油，用攪拌機拌成蓉後，放入魚湯袋搾乾水份，放入模具成形，完成。
浸軟後將鮑鮑去除內臟，清潔乾淨
用燒鴨高湯，比起用水炆更香
買唔到老雞，就用普通雞，下次做時可以預先同雞檔預訂
No comments:
Post a Comment