油封鴨腿佐蕪花果紅酒醬 Confit de Canard, sauce aux figues

妹妹從法國帶來 Duck Confit，已經處理好，煎返香佢就可以做到外脆內嫩嘅感覺，最好用鑄鐵鑊煎，表皮煎得更香脆，所以今次我唔想寫鴨腿嘅處理方法；但佐呢一隻鴨腿嘅無花果醬我就想分享下，用port wine 同紅酒煮嘅無花果帶微酸，醬汁有酒香，同鴨腿好夾。放喺鴨腿下面嘅係小扁豆，吸收埋鴨嘅精華。

鵝油粟米忌廉濃湯 Creme de mais

本來想做白露荀忌廉濃湯，但搵勻所有supermarket都無，所以無計轉menu，用粟米做主角。4條粟米做5個湯，粟米超甜，個湯超濃滑，而重點用左鵝油煮，提昇左湯嘅香味，好正。

聖誔頭盤 : 鵝肝醬多士伴無花果.牛油果蟹肉他他伴熱情果醬.紅菜頭慕絲凍湯.卡邦尼松露意粉

構思呢份Starter嘅時候，希望每一道都帶出唔同嘅口感：鵝肝醬bruchetta嘅香脆；牛油果蟹肉他他嘅清新爽滑；紅菜頭慕絲凍湯嘅creamy柔順；最後truffles fetuccini carbonara加有脆煙肉嘅香脆濃郁。而4道菜都以唔同colour&shape present，大家都好喜歡，最開心當然是我。

Family X'mas 2014

今次聖誕做一個簡單版法國menu，本身設計嘅menu去到尾都改左不少，carbonara fettuccini 由主菜變成頭盤、本來想做白露荀濃湯，但因為買唔到而改做粟米濃湯、見到新鮮熱情果而將他他加入火龍果再做熱情果醬。大家都食得好滿意，Merry Christmas!!!

趕住開餐忙碌中擺錯晒啲餐具，後尾先發覺，真係失禮 :’P

包餃子

包餃子真好玩，有老公同我一齊包，how sweet～哈哈！包餃子可以促進感情，唔係呃你，冬天一齊包多啲餃子啦：D

意式燉牛膝 Osso Buco

真是可恨的牛膝，中間那個骨膸真是美味到不得了，但又是極高脂高膽固醇的東西，怎麼辦呢！一口半口都可以吧，哈哈！人總難以戰勝美味。這味菜式醬汁也夠吸引，老公試味後狂加撈飯。肉質要夠腍，煎的時候不要過火，燉長一點時間更好。

免治牛肉洋蔥批 Pie Onion and Beef

一個人嘅晚飯，你會諗起咩？外賣？餐蛋麵？今晚我一個人食，竟然心血來潮焗批，哈哈，sounds crazy, right?! anyway，個批超正，又，臨近聖誕，批都係好啱party嘅食物，同大家分享下啦；D

Ceasar Salad Dressing

出街食都好喜歡叫Ceasar Salad, 但是真的，每一家做的sauce都不同，有些太酸，有些鹹味不夠，然而超市買嘅醬亦都唔係嗰回事。所以我最鍾意喺屋企自己做。簡單嚟講，用新鮮嘅羅馬生菜，配上呢個sauce，再喺面灑上麵包脆脆同碎芝士，已經完成一道美味非常嘅Ceasar Salad喇！

蕪花果藜麥沙律

藜麥為新興健康食品，英文Quinoa，含豐富纖維、蛋白質及維生素，秘魯的古印加人更稱它為「五穀之母」。它有淡淡麥味，煮起來像普通米一般吸水後用膨脹，口感像蟹籽清爽，可以當作米飯三餐享用。做鹹做甜都得，用來做沙律效果都很好，營養豐富之餘，口感亦提昇了。煮的是候藜麥3：水 1，像煮risotto一樣就ok！：）

泰式椰汁三文魚伴紫洋蔥沙律 Salmon in Thai Coconut Sauce with Red Onion Salad

這個是參考星加坡名廚Willin Low嘅食譜。Chef Willin Low嘅食譜真係好吸引，既fushion又有亞洲特式，佢都係我喜愛嘅名廚之一。呢個菜式椰汁香濃，配上清爽帶酸嘅紫洋蔥沙律，紅洋蔥味偏甜，不會嗆喉，兩者的確好夾，而且個汁配飯好正，非常推介！

香蒜汁三色椒炒木耳

一個簡單易做又好味嘅素菜。營養師告訴大家多吃不同顏色的蔬菜可吸收不同的營養，三色椒紅黃綠就一次過滿足了營養方面，其熱量低，纖維多，含豐富維生素，且具很好的抗氧化功能。味道也各有不同，紅椒較甜口感適中；黃椒較淡較軟；青椒較甘較爽脆，三種不同的味道同煮令一道簡單的素菜更添美味。另外，木耳具降血脂功能，所以這道菜很適合經常煮食呢！